आमा म मरेको छैन

• By Kite Sansar
• April 15, 2021
• 1.03k
• 0

– लक्ष्मण चौलागाईं विद्रोही

एक्कासी नरभक्षी राक्षसको हुल

म भएको ठाउँमा आइपुग्यो

ड्याङ ड्याङ ड्याङ गोली पड्कियो

र पनि म ढलिन

जब म ढलें नि आमा

मेरो पैताला बाट ठोकिएको गोली

मेरो यो शिरबाट निकाल्ने

दुश्मनको दुस्साहस असफल भयो

फेरि मलाई ढालेर टाउकोमा

गोली ठोकियो त्यसपछि रगताम्य भएर म ढलेको

आमा हजुरको दस धारा दूध पिएको म

त्यति सजिलै ढाल्न गोली पनि असक्षम थियो

 त्यहा मेरो आमा हजुरको दस धारा

दुधको ताकत संगै म मजबुत थिएं

गरिब, भूमिहिन किसानको आवाज र भरोसा

म कतै तिनैको कारण पनि हो कि

मेरो प्राण सहजै जान गार्हो भो

अनि ठोक्यो बर्दिधारी गुन्डाले

इल्लिगल गोली अनि बल्ल बल्ल मेरो

भौतिक शरीर क्षेतबिक्षेत भएर

जन्मभूमिमा बजारिएको थियो

आमा म मरेको छैन

आकाशको बादलबाट नियालिरहेको छु

क्षितिजको घेराबाट हेरिरहेको छु

मलाई हत्या गर्ने हत्याराहरु पक्राउ परे

त आमा सायदै उनिहरुको राज छ

अहिले उनिहरु खुलमखुल्ला हिडिरहेका छन् रे

म फेरि जन्म लिनेछु

आमा दुर्गादेवीको कोखमा

बुवा खिलकराजको छोरा भएर

दिदिबहिनी लक्ष्मी, सानू, कान्छीको दाईभाई भएर

हरिकृष्ण मेरो न्यायको निम्ति

अथक आवाज उठाउदैछ हैन र आमा

कलाको सिउँदोको सिन्दुर र गलाको पोते

फुक्लिए पनि म मरेको छैन

भौतिक शरीर मात्रै ढलेको हो

आमा म फेरि आउदैछु

दुश्मनसँग बदला लिन

हैन त्यो दुश्मनसँगको मेरो रिसिबी छैन

छ त केवल चिन्ता मेरो आत्मालाई

अहिले पनि दिनहिन, भूमीहिन किसानको

जीवन रक्षा गर्न

उनिहरुको सुदिन ल्याउन

विक्षिप्त र शोकाकुल नहुनु है

मेरा बा आमा दिदिहरु,

बहिनि र भाइ हरिकृष्ण म मरेको छैन……

तर बैरिले दोहोरो भिडन्त भन्दै

मलाई मारेर पनि मार्ने दुस्साहस गर्दैछ रे

आमा तर म भौतिक रूपमा मात्रै अस्ताएको हुं

सुकुम्बासी सामु गएर सोध्नुस त

म सबैको साथ छु म मरेको छैन……